الصاروخ الصينى لم يستقر

بص هو أنا مش عايز أرعبك، بس الصاروخ الصيني اللي فُقِدت السيطرة عليه عبر من فوق مصر امبارح!!

عارف انت الصاروخ اللي فقدت الصين السيطرة عليه تمامًا من يومين، وعمال بيدور حوالين الأرض تمهيدًا لإنه يقع في مكان عشوائي؟!.. أهو الصاروخ ده عدد من الخبراء الفلكيين المصريين قالوا إنه عبر من فوق مصر كذا مرة امبارح بالليل في غفلة عننا كلنا، وإن ارتفاعه قل أثناء عمليات العبور دي بشكل ملحوظ، وخطير فعلًا!! 

طب أيه اللي حصل بالظبط؟!.. هات كوباية شايك والنعناع، وتعالى أحكيلك ❤☕ 

بص يا سيدي.. حسب كلام الدكتور ياسر عبد الهادي، أستاذ علوم الفلك والمتحدث الإعلامي للمعهد القومي للبحوث الفلكية والجيوفيزيائية، اللي حصل هو إن إمبارح حوالي الساعة 11:39 مساءً، الصاروخ دخل ف مسار طويل بعرض أقصى الجنوب الغربي لمصر كلها، وعدى من فوق (جرجا) التابعة لمحافظة سوهاج على ارتفاع 296 كيلومتر، بسرعة خزعبلية تقدر بحوالي 28 ألف كيلومتر في الساعة!! 

هتلاقي صور تحت في الكومنتات من مواقع التتبع بتاعت الصاروخ هتوريك مسار عبوره من فوق المناطق المأهولة في مصر إمبارح، علمًا بإنه استغرق تحديدًا 8 دقايق و 40 ثانية عبر فيها بعرض البلد كلها 👇 ومش المرة دي بس.. ده عبر من فوق مصر بالعرض أكتر من 3 مرات تقريبًا، هتلاقي صور مختلفة ليهم تحت مع البوست وفي الكومنتات 👇 شوفهم ولاحظ معدل تناقص الإرتفاع بتاعه!! 

وده طبعًا مؤشر خطير جدًا، لإن زي ما أنا قلت في مقال سابق، الصاروخ وزنه يزيد عن ال 21.5 طن، وسرعته واصلة لحوالي 28 ألف كيلومتر في الساعة.. وده في الفضاء.. يعني السرعة دي هتتزايد كمان بسبب عجلة الجاذبية الأرضية، لما يخترق الغلاف الجوي ويبدأ في السقوط الحر على الأرض، بغض النظر عن إن الإحتكاك هيحد من الزيادة دي نسبيًا وهيحرق جزء من كتلته!! 

هتسألني ليه مش هيتحرق بالكامل هقولك عشان الصاروخ أصلًا هيمر في الغلاف الجوي ف وقت قصير جدًا بسبب سرعته ف مش هيلحق يتحرق إلا جزئيًا، وبعدين معظم أجزاء جسمه مصنوعة من مواد مقاومة للحرارة العالية وعليها دروع حرارية.. 

إحسب أنت سرعة جسم بيسقط سقوط حر من الفضاء على ارتفاع 250 كيلومتر مثلًا، وعوض بالناتج في قانون نيوتن للجاذبية الأرضية وشوف معدل جذب الأرض له هيخلي السرعة توصل كام.. ومتنساش إن قانون أينشتاين بتاع النسبية، بيقول إن كل ما السرعة بتزيد الكتلة بتزيد.. لما تشوف الناتج هتعرف مدى الدمار اللي ممكن يسببه صاروخ وزنه مثلًا 15 طن بعد الاحتراق!! 

باختصار، السرعة دي هتخلي الأجزاء اللي هتوصل منه للأرض بدون احتراق ف الغلاف الجوي، أشبه بقنبلة شديدة التدمير، هتمحي المنطقة اللي هتقع فيها تمامًا!! والله أعلم هتقع فين وإمتى بالظبط.. 

عندك مثلًا الخبير الدكتور محمد سيد على حسن، الأستاذ المشارك السابق في جامعة كيوتو في اليابان، والباحث بوكالة الفضاء اليابانية JAXA، والمتخصص في هندسة الفضاء والنانو تكنولوجي، قال في بوست له على فيسبوك هتلاقيه في كومنت تحت 👇 إن ارتفاع الصاروخ عمال يتناقص، بالرغم من أنه بينزل ويطلع.. وذلك لأنه بيدور في مدار بيضاوي يتراوح ارتفاعه ما بين 170 إلى حوالي 350 كم.. وأكتر أماكن وصل فيها لأقل ارتفاع له بدأت من مصر وشبه الجزيرة العربية واستمرت في المحيط الهندي، قبل ما يبدأ ارتفاعه يعلى مرة تانية!! 

المشكلة إنه بسبب سرعته دي، بيدور حوالين الكوكب كله مرة كل 90 دقيقة، يعني هو بيدور ويرجع مرة تانية لبلاد تانية، ولازم هيلف ويرجع تاني لمصر، بس المرة دي ممكن يمر ف مسار مختلف وفوق محافظة مختلفة.. 

طبعًا احتمال سقوطه أصلًا فوق منطقة مأهولة بالسكان هو احتمال ضعيف عشان تلتين مساحة الأرض تقريبًا هي مسطحات مائية، والتلت الباقي في منه جزء كبير صحاري وغابات.. فبالتالي في فرصة كبيرة إنه يقع في محيط أو صحراء، وساعتها هنحمد ربنا.. 

لكن بردو يظل في احتمال حقيقي وفرصة مش صغيرة خالص إنه يقع فوق مدينة أو قرية أو أي مكان عايش فيه ناس.. وطبعًا مش محتاج أقولك إنه صعب جدًا التنبؤ بمكان وزمان سقوط الصاروخ بشكل محدد، عشان السرعة الرهيبة اللي هو ماشي بيها.. صحيح إننا نقدر نتابع مساره من خلال مواقع التتبع بتاعت الأقمار الصناعية، بس بردو التنبؤ بمعاد ومكان سقوطه قبلها بفترة تكفي لإخلاء أي سكان في أي منطقة هتبقى قريبة من موقع سقوطه، هو شبه مستحيل.. 

ف عشان كده يا ريت تفضلوا متابعين أخبار الصاروخ ده كويس.. وممكن تتبعوا مساره أول بأول وبشكل فوري من اللينك ده هنا:

https://orbit.ing-now.com/satellite/48275/2021-035b/cz-5b/ 

الصاروخ حسب الحسابات التقديرية متوقع سقوطه يوم 9 أو 10 مايو اللي جايين.. فخلوا بالكم في حالة تم إطلاق أي تحذيرات من سقوط جزء منه في أي حتة في مصر أو قريبة من مصر.. طبعًا ده احتمال ضعيف جدًا، بس خدوا بالكم بردو حفاظًا على الأرواح.. 

شوفوا الصور واللينكات اللي في الكومنتات ضروري 👇 

يا ريت لو تقدروا تعرفوا صحابكم المهتمين بالموضوع ده، وشاركوهم التفاصيل اللي في البوست هنا من خلال الشير للبوست على قد ما تقدروا، والمنشن ليهم تحت في الكومنتات 👇 ودي شوية مصادر للخبر بتاع عبور الصاروخ من فوق مصر وكلام الخبراء الفلكيين المصريين عنه: 

https://m.elwatannews.com/news/details/5477877 

https://bit.ly/3b0KTBB 

https://bit.ly/3eTcx4V 

شكرًا وربنا يحفظنا جميعًا.